ନୟାଗଡ଼: ନୟାଗଡ଼ ଜିଲ୍ଲାପାଳ ଅକ୍ଷୟ ସୁନିଲ ଅଗ୍ରୱାଲ ଏବଂ ଜିଲ୍ଲା ଶିକ୍ଷା ଅଧିକାରୀ ଚିତ୍ତରଞ୍ଜନ ପାଣ୍ଡେ ଏବେ ଆକ୍ସନ ମୋଡ଼ରେ ଅଛନ୍ତି। ନୂଆଗାଁ ବ୍ଲକର ମହିପୁର ଏବଂ ଚାହାଳି ହାଇ ସ୍କୁଲ ଭିଜିଟ୍ ପରେ ସେମାନେ କହିଛନ୍ତି, ଅମାନିଆ ଶିକ୍ଷକମାନେ ସାବାଡ ହେବେ ଏବଂ ସମସ୍ତ ବିଦ୍ୟାଳୟରେ ନିୟମିତ ସରପ୍ରାଇଜ୍ ଭିଜିଟ୍ କରାଯିବ। ବିଭିନ୍ନ ବିଦ୍ୟାଳୟରେ ଶିକ୍ଷକ ଓ ଶିକ୍ଷୟତ୍ରୀମାନେ ଠିକ୍ ସମୟରେ ସ୍କୁଲ ଆସୁ ନେଇ ଅଭିଯୋଗ ମିଳିଥିଲା। ଏପରିକି ମଧ୍ୟାହ୍ନ ଭୋଜନରେ ପାଣିଆ ଡାଲମା ଛାତ୍ରଛାତ୍ରୀଙ୍କୁ ଦିଆଯାଉଥିବା ନେଇ ମଧ୍ୟ ଅଭିଯୋଗ ହୋଇଥିଲା।
ସ୍କୁଲ ଭିଜିଟ୍ ସମୟରେ ଜିଲ୍ଲାପାଳ ଅକ୍ଷୟ ସୁନିଲ ଅଗ୍ରୱାଲ ନିଜେ ଶିକ୍ଷକ ସାଜି ଛାତ୍ରଛାତ୍ରୀଙ୍କୁ ପାଠ ପଢ଼ାଇ ଥିଲେ ଏବଂ ବିଭିନ୍ନ ପ୍ରଶ୍ନ ପଚାରିଥିଲେ। ବିଦ୍ୟାଳୟରେ କମ୍ପ୍ୟୁଟର ଶିକ୍ଷା କେମିତି ମିଳୁଛି ସେନେଇ ଛାତ୍ରଛାତ୍ରୀଙ୍କ ସହ ଆଲୋଚନା କରିଥିଲେ। ଏପଟେ ଜିଲ୍ଲା ଶିକ୍ଷା ଅଧିକାରୀ ଚିତ୍ତରଞ୍ଜନ ପାଣ୍ଡେ ମଧ୍ୟାହ୍ନ ଭୋଜନର ମାନ ପରୀକ୍ଷା କରିଥିଲେ ଏବଂ ପିଲାଙ୍କ ସହ ବସି ଭୋଜନ କରିଥିଲେ। ଦୁଇ ଅଧିକାରୀଙ୍କ ଏଭଳି ଆକ୍ସନ ରୂପ ସ୍କୁଲ ଭିଜିଟ୍ ପ୍ରୋଗ୍ରାମ ସମୟରେ ଦେଖିବାକୁ ମିଳିଥିଲା।
ଜିଲ୍ଲା ଶିକ୍ଷା ଅଧିକାରୀ କହିଛନ୍ତି, ଆଗକୁ ଜିଲ୍ଲାର ସମସ୍ତ ବିଦ୍ୟାଳୟରେ ନିୟମିତ ଯାଞ୍ଚ ପାଇଁ ସ୍ଵତନ୍ତ୍ର ଟିମ୍ ଗଠନ କରାଯିବ। ଜିଲ୍ଲାପାଳ ଅକ୍ଷୟ ସୁନିଲ ଅଗ୍ରୱାଲ କହିଛନ୍ତି ଅମାନିଆ ଶିକ୍ଷକଙ୍କ ବିରୋଧରେ କଡା କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ଏହି କଡା ଚେତାବନୀ ନୟାଗଡ଼ ଜିଲ୍ଲାର ଶିକ୍ଷକ ଶିକ୍ଷୟତ୍ରୀ ମହଲରେ ଛନକା ପଶାଇଛି। ସ୍କୁଲକୁ ଆସିବା ଓ ଯିବା ସମୟରେ ଅବହେଳା କଲେ କିମ୍ବା ମଧ୍ୟାହ୍ନ ଭୋଜନରେ ଅନ୍ୟମିତା ହେଲେ, ସେମାନଙ୍କ ବିରୋଧରେ କଡା କାର୍ଯ୍ୟାନୁଷ୍ଠାନ ନିଆଯିବ ବୋଲି ଜିଲ୍ଲା ଶିକ୍ଷା ଅଧିକାରୀ ଚେତାବନୀ ଦେଇଛନ୍ତି।
