ଭୁବନେଶ୍ୱର : ନୂଆପଡ଼ା ଉପନିର୍ବାଚନ ପାଇଁ ଚାଲୁଥିବା ପ୍ରତିଦିନର ସାମ୍ବାଦିକ ସମ୍ମିଳନୀରେ ଆଜି ପୂର୍ବତନ ମନ୍ତ୍ରୀ ଜଗନ୍ନାଥ ପଟ୍ଟନାୟକ ଯୋଗଦେଲେ। ସେ କଂଗ୍ରେସ ଆଦିବାସୀ ପ୍ରାର୍ଥୀ ଘାସିରାମ ମାଝୀଙ୍କ ବିଜୟ ଉପରେ ଆଶା ବ୍ୟକ୍ତ କଲେ। ସେ ଆସନ୍ତା ବାତ୍ୟା “ମନ୍ଥା” ପାଇଁ ଲୋକଙ୍କୁ ସତର୍କ ରହିବାକୁ ଅନୁରୋଧ କଲେ। ସରକାରକୁ ମଧ୍ୟ ପ୍ରସ୍ତୁତ ରହିବା ପରାମର୍ଶ ଦେଲେ।
ନୂଆପଡ଼ାରେ ଏବେ ବିଚିତ୍ର ରାଜନୀତି ଦେଖାଯାଉଛି। ବିଜେପି ଓ ବିଜେଡି ଉଭୟ ରାଜୁ ଢୋଲକିଆଙ୍କ ଫଟୋ ପୋଷ୍ଟରରେ ବ୍ୟବହାର କରୁଛନ୍ତି। ସେଥିପାଇଁ ଲୋକମାନଙ୍କ ମଧ୍ୟରେ ଚର୍ଚ୍ଚା ଚାଲିଛି। ବିଜେପି କର୍ମୀମାନଙ୍କ ଅସହଯୋଗ ଦଳରେ ଅସନ୍ତୋଷ ସୃଷ୍ଟି କରିଛି। ମୁଖ୍ୟମନ୍ତ୍ରୀଙ୍କ ସଭା ଜନସମାଗମ ଅଭାବରୁ ବିଫଳ ହୋଇଛି।
ଜଗନ୍ନାଥ ପଟ୍ଟନାୟକ କହିଲେ, “ବିଜେପି ଓ ବିଜେଡି ମଧ୍ୟରେ ଗୁପ୍ତ ସାଲିସ ହୋଇଛି। ସେମାନେ ବନ୍ଧୁତ୍ୱ ଲଢେଇ କରୁଛନ୍ତି। କଂଗ୍ରେସ ଆଦିବାସୀ ଓ ସାମାଜିକ ନ୍ୟାୟ ମୁଦ୍ଦାକୁ ନେଇ ଲଢୁଛି।”
ଘାସିରାମ ମାଝୀ ଜଣେ ଆଦିବାସୀ ଓ ସର୍ବମାନ୍ୟ ନେତା। ସେ ଚାରିଥର ନିର୍ବାଚନ ଲଢିଛନ୍ତି ଏବଂ ଗତଥରେ ୫୧ ହଜାର ଭୋଟ ପାଇ ଦ୍ୱିତୀୟ ହୋଇଥିଲେ। ଜିଲ୍ଲାରେ ୪୦% ଆଦିବାସୀ ଥିଲେ ମଧ୍ୟ ବିଜେପି ଓ ବିଜେଡି ଆଦିବାସୀ ପ୍ରାର୍ଥୀ ଦେଇନଥିଲେ। କଂଗ୍ରେସ ରାହୁଳ ଗାନ୍ଧୀଙ୍କ ଆଦର୍ଶ ଅନୁସାରେ ଆଦିବାସୀ ପ୍ରାର୍ଥୀ ଦେଇଛି।
ପଟ୍ଟନାୟକ କହିଲେ, “ନାରୀ, ଆଦିବାସୀ ଓ କୃଷକଙ୍କ ନ୍ୟାୟ ହେଉଛି ଆମ ଲକ୍ଷ୍ୟ। ବିଜେପି ଓ ବିଜେଡି ପାଖରେ ଏକୋଟି ମୁଦ୍ଦା ନାହିଁ।” ସେ ଅଭିଯୋଗ କଲେ, “ସୁଭଦ୍ରା ଯୋଜନା ଓ ଅନ୍ୟ ଘୋଷଣା ଭ୍ରମାତ୍ମକ। ବିଜେପି ଭୋଟରଙ୍କୁ ଭୁଲାଇବାକୁ ଚେଷ୍ଟା କରୁଛି।”
ସେ କହିଲେ, “ଇନ୍ଦିରା ଗାନ୍ଧୀ କେ.ବି.କେ ଯୋଜନା ଆରମ୍ଭ କରି ଦୁର୍ଭିକ୍ଷ ନିୟନ୍ତ୍ରଣ କରିଥିଲେ। ଇନ୍ଦ୍ରାବତୀ ଓ ପତୋରା ଡ୍ୟାମ ରାଜ୍ୟକୁ ଉନ୍ନତି ଦେଇଛି।” ପଟ୍ଟନାୟକ ଯୋଗ କଲେ, “ୟୁପିଏ ସରକାର ସମୟରେ ଶିକ୍ଷା, ସ୍ୱାସ୍ଥ୍ୟ ଓ ରାସ୍ତାରେ ଅଭୁତପୂର୍ବ ଉନ୍ନତି ହୋଇଛି।”
ଶେଷରେ ସେ କହିଲେ, “କଂଗ୍ରେସ ଜିତିବ। ଅପପ୍ରଚାର ରାଜନୀତି ଫଳ ଦେବନାହିଁ।”
