ରାଉରକେଲା: ମା, ମମତା, କର୍ତ୍ତବ୍ୟ । ଦୁଇ ଜଣଙ୍କ ସାଙ୍ଗରେ ନେଇ ଯାଉଛନ୍ତି ଜଣେ ମାଆ । ମମତା ଆଗରେ ହାର ମାନିନି କର୍ତ୍ତବ୍ୟ କିମ୍ବା କର୍ତ୍ତବ୍ୟ ପାଇଁ ମମତାକୁ ଅଣଦେଖା କରିନାହାନ୍ତି ସେହି ମାଆ ଜଣକ । ଏମିତି ଜଣେ ମାଆ ହେଉଛନ୍ତି ରାଉରକେଲାର ମହିଳା ହୋମଗାର୍ଡ ଆଶା ତିଗ୍ଗା । ବୃତ୍ତିରେ ଜଣେ ମହିଳା ହୋମଗାର୍ଡ । ଡହଡହ ଖରାରେ ଯେତେବେଳେ ପଥଚାରୀଟିଏ ହୁଅନ୍ତୁ ବା ବାଇକ ଚାଳକ ଟ୍ରାଫିକ ପୋଷ୍ଟରେ ସ୍ବଳ୍ପ ସମୟ ରହଣି ଭିତରେ ଛାଇ ଟିକେ ଖୋଜୁଥିଲା ବେଳେ ଘଣ୍ଟାଘଣ୍ଟା ନୁହେଁ ତ ଦିନଦିନ ଧରି ଟ୍ରାଫିକ ପୋଷ୍ଟରେ କର୍ତ୍ତବ୍ୟ କରୁଛନ୍ତି ଆଶା ।
ଆଶାଙ୍କ ସଂଘର୍ଷର କାହାଣୀ କଥା କହିଲେ ଯେ କେହି ତାଙ୍କୁ ପ୍ରଶଂସା ନ କରି ରହିପାରିବନି । ଦୁଇ ଝିଅ ଓ ସ୍ବାମୀଙ୍କୁ ନେଇ ଆଶାଙ୍କ ସଂସାର । ସ୍ବାମୀ ବୃତ୍ତିରେ ଡ୍ରାଇଭର । କିଛି ଦିନ ତଳେ ଦୁର୍ଘଟଣାରେ ଆହତ ହେଲା ପରେ ଏବେ ସେ ଶଯ୍ୟାଶାୟୀ । ଶାଶୁ, ଶ୍ବଶୂର ବି ନାହାନ୍ତି । ଘରେ ବଡ଼ ଝିଅ ଓ ସ୍ବାମୀ । ସାନ ଝିଅକୁ ମାତ୍ର ୫ମାସ । ଏଭଳି ସ୍ଥିତିରେ ଆଶାଙ୍କୁ ଭାରି ପଡ଼ିଛି ସଂସାର ବୋଝ । ଘର ଚଳାଇବାକୁ ୫ମାସର ଝିଅକୁ ନେଇ ଡ୍ୟୁଟି କରୁଛନ୍ତି ଆଶା ।
ପୋଲିସର ପୋଷାକ ପିନ୍ଧି, ଗୃହରକ୍ଷୀର ଡ୍ୟୁଟି କରୁଛନ୍ତି ମହିଳା ଆଉ କୋଳରେ ୫ମାସର ଛୁଆକୁ କାଖେଇ ମାଆର ଦାୟିତ୍ୱ । ରାଉରକେଲା ବିଟ ହାଉସରେ ଗୃହରକ୍ଷୀ ଡ୍ୟୁଟି ଆଉ କାନ୍ଧର ଝୁଲା ବ୍ୟାଗ୍ ଭିତରେ ୫ମାସର ଝିଅ । ରାଉରକେଲା ଗୃହରକ୍ଷୀ ବାହିନୀରେ ହୋମଗାର୍ଡ ଚାକିରି କରୁଥିବା ଆଶା ତିଗ୍ଗାଙ୍କ କର୍ତ୍ତବ୍ୟନିଷ୍ଠା ଆଜି ସାଜିଛି ଉଦାହରଣ । ପିଲାଟିକୁ ସମ୍ଭାଳିବାକୁ ପରିବାରରେ କେହି ନାହାନ୍ତି । ସ୍ୱାମୀ ସଡ଼କ ଦୁର୍ଘଟଣାରେ ଆହତ ହୋଇ ଶଯ୍ୟାଶାୟୀ । ତେଣୁ ଉପାୟଶୂନ୍ୟ ହୋଇ ୫ ମାସର ଛୁଆକୁ କୋଳରେ ଧରି ଆଶା ଓହ୍ଲାଇ ଆସନ୍ତି ଡ୍ୟୁଟିକୁ । ଛେଣ୍ଡ ଥାନା ଅଧୀନରେ ଥିବା ସ୍ପେସ୍ ଛକରେ ଡ୍ୟୁଟି କରୁଛନ୍ତି ଆଶା । ପିଲାକୁ କୋଳରେ ଧରି ଟ୍ରାଫିକ ଡ୍ୟୁଟି ସୁରୁଖୁରୁରେ କରୁଥିବା ଆଶାଙ୍କୁ ସମସ୍ତଙ୍କ ପ୍ରଶଂସା । ସକାଳ ୬ଟାରୁ ଅପରାହ୍ନ ୨ଟା ଯାଏ ଏମିତି କୋଳରେ ଛୁଆକୁ ଧରି ଡ୍ୟୁଟି କରୁଛନ୍ତି । ଆଶାଙ୍କ କାମ ଓ ମମତାକୁ ସମସ୍ତେ ପ୍ରଶଂସା କରୁଛନ୍ତି । ଜିଲ୍ଲା ପୋଲିସ ପକ୍ଷରୁ ଆଶାଙ୍କ ଏଭଳି କାର୍ଯ୍ୟକୁ ସ୍ୱାଗତ କରାଯାଇଛି, ଉଦାହରଣ ସାଜିଛନ୍ତି ଆଶା ।
