ଝାରସୁଗୁଡ଼ା (ବିଜୟ ଶଙ୍କର ଦାଶ) : ଝାରସୁଗୁଡ଼ା ସଦର ବ୍ଲକ ବ୍ରଜରାଜନଗର କୁଦୋପାଲି ପଞ୍ଚାୟତବାସୀ ଜୀବନ ଜୀବିକା ଉପରେ କୁଠାରଘାତ ହେଉଥିବା ଅଭିଯୋଗ ହେଉଛି l କୁଦୋପାଲି ପଞ୍ଚାୟତ ୱାର୍ଡ ନ- ୩ ଓରାମପଡା ରେ ପ୍ରାୟ ୪୦୦ରୁ ଊର୍ଦ୍ଧ୍ଵ ଲୋକ ବସବାସ କରୁଛନ୍ତି l ଗ୍ରାମରେ ନାଁ ରହିଛି ବିଶୁଦ୍ଧ ପାନୀୟ ଜଳ ସୁବିଧା ନାଁ ଆଲୁଅ ବ୍ୟବସ୍ଥା l ଯାତାୟାତ ପାଇଁ କେବଳ ଗୋଟିଏ ରାସ୍ତା କୁ ଛାଡ଼ି ଦେଲେ ଅନ୍ୟ ବିକଳ୍ପ ରାସ୍ତା ଟିଏ ନାହିଁ l ଯେଉଁ ରାସ୍ତା ଅଛି ସେଥିରେ ଭାରୀଯାନ ଚଳାଚଳ ସହ କୋଇଲା ଗୁଣ୍ଡ ଯୋଗୁଁ ଲୋକେ ଭୟଭୀତ ଓ ଅତିଷ୍ଠ ହୋଇ ପଡିଲେଣି l ଗ୍ରାମବାସୀଙ୍କ ସୂରକ୍ଷା ଦୃଷ୍ଟିରୁ ଉକ୍ତ ରାସ୍ତା ଉପରେ ଭାରୀ ଯାନବାହାନ ଚଳାଚଳ ଉପରେ ୨୦୧୨ ମସିହାରେ ପ୍ରତିବନ୍ଧକ ଲଗାଇଥିଲେ ତତ୍କାଳୀନ ଜିଲ୍ଲାପାଳ ପୁନମ ଗୁହା ତାପସ କୁମାର l ତେବେ ଗତ କିଛି ମାସହେଲା ଉକ୍ତ ରାସ୍ତା ଦେଇ ପ୍ରତ୍ୟେକ ଦିନ ହଜାର ହଜାର ସଂଖ୍ୟାରେ ଭାରୀଯାନ କୋଇଲା ପରିବହନ ହେଉଥିବା ଅଭିଯୋଗ ହେଉଛି l
ଭାରୀ ଯାନବାହାନ ଚଳାଚଳ ଯୋଗୁଁ ରାସ୍ତା ଏତେ ଧୂଆଁଳିଆ ହୋଇଯାଉଛି ଯେ ଅପରପାର୍ଶ୍ଵର ଲୋକ ଠିକ୍ରେ ଦେଖାଯାଉ ନାହାନ୍ତି ସେଥିରେ ପୁଣି ଅନେକ ବ୍ୟକ୍ତିଙ୍କୁ ଶ୍ଵାସକ୍ରିୟାରେ ସମସ୍ୟା ହେଉଛି l ଫଳରେ ଶିଶୁ, କିଶୋରୀ ଓ ଗର୍ଭବତୀ ମହିଳାଙ୍କୁ ଅଙ୍ଗନବାଡି ଯିବାକୁ ହେଲେ ଜୀବନକୁ ବାଜିରେ ଲଗାଇ ପ୍ରାୟ ୧ କିମି ଯିବାକୁ ପଡୁଛି l ଏଠାରେ ସୂଚନାଯୋଗ୍ୟ ଯେ କୁଦୋପାଲି ପଞ୍ଚାୟତକୁ ତିନୋଟି କୋଇଲା କ୍ଷେତ୍ର ଘେରି ରହିଛି l ଭାରୀଯାନ ଚଳାଚଳ ଯୋଗୁଁ ଛୋଟଛାଟ ପିଲାମାନେ ସ୍କୁଲ ଯିବା ସମୟରେ ନାନାଦି ସମସ୍ୟାର ସମ୍ମୁଖୀନ ହେଉଛନ୍ତି l ଗ୍ରାମରେ ଥିବା ପୋଖରୀ ଓ ଘର ମାନଙ୍କରେ କୋଇଲା ଗୁଣ୍ଡ ପଡ଼ି ପ୍ରଦୂଷଣ ସୃଷ୍ଟି କରୁଛି l
ଏହି ସମସ୍ୟାର ସ୍ଥାୟୀ ସମାଧାନ ପାଇଁ ଜିଲ୍ଲାପାଳ ଙ୍କ ଅଭିଯୋଗ ଶୁଣାଣିରେ ଏକାଧିକ ଥର ଅଭିଯୋଗ ହୋଇଥିବା ସତ୍ତ୍ଵେ ଜିଲ୍ଲା ପ୍ରଶାସନ ତରଫରୁ ଏ ଯାଏଁ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇନଥିବା ଅଭିଯୋଗ କରିଛନ୍ତି ସମିତି ସଭ୍ୟା ରଶ୍ମିତା ପ୍ରଧାନ l ଏହି ସମସ୍ୟାର ସ୍ଥାୟୀ ସମାଧାନ ନହେଲେ ରାଜରାସ୍ତାକୁ ଓହ୍ଲାଇବା ପାଇଁ ବାଧ୍ୟ ହେବୁ ବୋଲି କହିଛନ୍ତି କୁଦୋପାଲି ସମିତି ସଭ୍ୟା ରଶ୍ମିତା ପ୍ରଧାନ, ଓରାମ ପଡା ର ୱାର୍ଡ ସଭ୍ୟା ଜ୍ୟୋତ୍ସ୍ନା ଓରାମ, ବାସନ୍ତୀ ଓରାମ, ମାଳତି ଓରାମ, ତିଳୋତ୍ତମା ଓରାମ, ବିଦ୍ୟାଧର ଓରାମ, ମାନ ଓରାମ, ରାଜକୁମାର ଓରାମ ଓ ସୁନୀଲ ଓରାମଙ୍କ ସହ ଓରାମ ପଡ଼ାବାସୀ l
