ଚୋରି ଉଦ୍ଧାର ମୋବାଇଲ ହସ୍ତାନ୍ତର ମେଳା: ଜିଲ୍ଲା ପୁଲିସର ଅଭିନବ ପ୍ରୟାସ

ଝାରସୁଗୁଡ଼ା(ବିଜୟ ଶଙ୍କର ଦାଶ) : ଜିଲ୍ଲା ପୁଲିସ୍ ପ୍ରଶାସନ ପକ୍ଷରୁ ଚୋରି ଉଦ୍ଧାର ମୋବାଇଲ ହସ୍ତାନ୍ତର ମେଳା ଅନୁଷ୍ଠିତ ହୋଇଛି l ଜିଲ୍ଲା ପୁଲିସ କାର୍ଯ୍ୟାଳୟ ପରିସରରେ ଆୟୋଜିତ କାର୍ଯ୍ୟକ୍ରମରେ ଆରକ୍ଷୀ ଅଧିକ୍ଷକ Gundala Reddy Raghavendra ଯୋଗଦେଇ ୧୦୧ ଟି ଉଦ୍ଧାର ମୋବାଇଲ ହସ୍ତାନ୍ତର କରିବା ସହ ଜିଲ୍ଲା ପୁଲିସ୍ ଅଧିକାରୀଙ୍କ ପଦକ୍ଷେପକୁ ପ୍ରଶଂସା କରିଥିଲେ l ଦିନକୁ ଦିନ ମୋବାଇଲ ଚୋରି ଘଟଣା ବୃଦ୍ଧି ପାଉଥୁବା ବେଳେ ଏଥିରେ ଅଙ୍କୁଶ ଲଗାଇବା ସହ ଚୋରି ମୋବାଇଲ ଗୁଡ଼ିକୁ ଉଦ୍ଧାର କରିବାକୁ ବରିଷ୍ଠ ପୁଲିସ ଅଧିକାରୀଙ୍କ ସହ ଆଲୋଚନା କରିଥିଲେ ଆରକ୍ଷୀ ଅଧିକ୍ଷକ ରାଘବେନ୍ଦ୍ର l

ଜିଲ୍ଲାର ବିଭିନ୍ନ ଥାନା ଅଞ୍ଚଳରେ ଚୋରି ହୋଇଥିବା ମାମଲା ଗୁଡ଼ିକର ଲିଷ୍ଟ ପ୍ରସ୍ତୁତ କରିବା ସହ ସମସ୍ତ ମୋବାଇଲ ଗୁଡ଼ିକୁ ଉଦ୍ଧାର କରିବା ପାଇଁ ଆରକ୍ଷୀ ଅଧିକ୍ଷକ ରାଘବେନ୍ଦ୍ର ବରିଷ୍ଟ ପୁଲିସ୍ ଅଧିକାରୀଙ୍କୁ ନିର୍ଦ୍ଦେଶ ଦେଇଥିଲେ l ଆରକ୍ଷୀ ଅଧିକ୍ଷକଙ୍କ ନିର୍ଦ୍ଦେଶ ପରେ ୧୦୧ ଟି ମୋବାଇଲ ଉଦ୍ଧାର ହୋଇଥିଲା l ଉଦ୍ଧାର ହୋଇଥିବା କେତେକ ମୋବାଇଲ ଗୁଡ଼ିକୁ ଆଜି ମୋବାଇଲ ମାଲିକଙ୍କୁ ହସ୍ତାନ୍ତର କରାଯାଇଛି l ହେଲେ କେତେକ ମୋବାଇଲ ମାଲିକ କୌଣସି କାରଣ ବଶତଃ ଆଜି ଆସିନ ଥିବା ବେଳେ ଆଗାମୀ ଦିନରେ ସମସ୍ତ ମୋବାଇଲ ଗୁଡ଼ିକୁ ହସ୍ତାନ୍ତର କରିବାର ବ୍ୟବସ୍ଥା କରାଯିବ ବୋଲି ଆରକ୍ଷୀ ଅଧିକ୍ଷକ ରାଘବେନ୍ଦ୍ର କହିଥିଲେ l

ଅନେକ ସମୟରେ କାଗଜପତ୍ର ଜାଲିଆତି କରି ଅନ୍ୟ ଲୋକ ସିମ କାର୍ଡ ବ୍ୟବହାର କରୁଥିବା ବେଳେ କୌଣସି ଅପରାଧ ଘଟିଲେ ଯାହାଙ୍କ ନାମରେ ସିମ କାର୍ଡ ଥାଏ ତାଙ୍କୁ ନାନାଦି ସମସ୍ୟାର ସମ୍ମୁଖୀନ ହେବାକୁ ପଡ଼ିଥାଏ l ଏହି ସମସ୍ୟାରୁ ନିଜକୁ ସୁରକ୍ଷିତ ଅବା ମୁକୁଳିବା ପାଇଁ ସଂଚାର ସାଥି ଆପରେ ଯାଞ୍ଚ କରି ଆବଶ୍ୟକ ସ୍ଥଳେ ସିମ କାର୍ଡକୁ ବନ୍ଦ କରାଯାଇ ପାରିବ l ସେହିପରି ମୋବାଇଲ ହଜିଗଲେ ଅବା ଚୋରି ହେଲେ ପ୍ରଥମେ ନିକଟସ୍ଥ ଥାନାରେ ଲିଖିତ ଅଭିଯୋଗ ଓ ପରେ CEIR portal (https://ceir.gov.in) କୁ ଯାଇ ହଜିଯାଇଥିବା ମୋବାଇଲକୁ କେମିତି ଲକ କରିବେ ସେନେଇ ଜିଲ୍ଲାବାସୀଙ୍କ ଉଦ୍ଧେଶ୍ୟରେ ପରାମର୍ଶ ଦେଇଥିଲେ ଆରକ୍ଷୀ ଅଧିକ୍ଷକ ରାଘବେନ୍ଦ୍ର l କାର୍ଯ୍ୟକ୍ରମରେ ଅତିରିକ୍ତ ଆରକ୍ଷୀ ଅଧିକ୍ଷକ ମଧୁସିକ୍ତା ମିଶ୍ର ଓ ଜେମ୍ସ ସମାଦ, ଝାରସୁଗୁଡ଼ା ଏସଡିପିଓ ଉମା ଶଙ୍କର ସିଂ ଓ ବ୍ରଜରାଜନଗର ଏସଡିପିଓ ଚିନ୍ତାମଣି ପ୍ରଧାନ, ବିଭିନ୍ନ ଥାନାର ଅଧିକାରୀ ଙ୍କ ସହ ବହୁ ପୁଲିସ ଅଧିକାରୀ ଉପସ୍ଥିତ ଥିଲେ l