କଟକ: ବ୍ରହ୍ମପୁର ବିଧାୟକ କେ. ଅନୀଲ କୁମାରଙ୍କ ନିର୍ବାଚନକୁ ଚ୍ୟାଲେଞ୍ଜ କରି ମାମଲା ଦାୟର କରିଥିବା ମନୋଜ କୁମାର ପଣ୍ଡାଙ୍କୁ ସୁରକ୍ଷା ପ୍ରଦାନ ପାଇଁ ହାଇକୋର୍ଟ ଏସ୍ପିଙ୍କୁ ନିର୍ଦ୍ଦେଶ ଦେଇଛନ୍ତି।
ଆଜି ହାଇକୋର୍ଟରେ ବ୍ରହ୍ମପୁର ବିଧାନସଭା ଆସନ ସଂପର୍କିତ ନିର୍ବାଚନୀ ମକଦ୍ଦମାରେ ଆବେଦନକାରୀ ମନୋଜ ପଣ୍ଡାଙ୍କ ସାକ୍ଷ୍ୟ ଗ୍ରହଣ ହୋଇଥିଲା। ବିଧାୟକ କେ.ଅନୀଲ କୁମାରଙ୍କ ତରଫରୁ ଆଇନଜୀବୀ ଜେରା କରିଥିଲେ, ଯାହା ଅସଂପୂର୍ଣ୍ଣ ରହିଥିଲା। ଅଧିକ ଜେରା ପାଇଁ ନଭେମ୍ବର ୧୦ ତାରିଖ ଧାର୍ଯ୍ୟ ହୋଇଛି।
ଏଥି ସହିତ, ଆବେଦନକାରୀଙ୍କ ପକ୍ଷରୁ ଜଣାଯାଇଛି ଯେ ଶ୍ରୀ ପଣ୍ଡାଙ୍କ ଜୀବନ ପ୍ରତି ବିପଦ ରହିଛି। କିଛିଦିନ ତଳେ ଅଜଣା ଲୋକେ ତାଙ୍କୁ ଅଟକ ରଖି ଧମକ ଦେଇଥିଲେ ବୋଲି ଅଭିଯୋଗ ଥିଲା। ଏହି ଅବସ୍ଥାରେ, ହାଇକୋର୍ଟ ଜିଲ୍ଲା ଏସ୍ପିଙ୍କୁ ନିର୍ଦ୍ଦେଶ ଦେଇଛି ଯେ ଆବେଦନକାରୀ ସାକ୍ଷୀଙ୍କୁ ପର୍ଯ୍ୟାପ୍ତ ସୁରକ୍ଷା ଦେଇ କୌଣସି ଅପ୍ରୀତିକର ଘଟଣା ଘଟିବାକୁ ନଦିଅନ୍ତୁ।
ଜଷ୍ଟିସ୍ ଶଶିକାନ୍ତ ମିଶ୍ରଙ୍କ ଖଣ୍ଡପୀଠ ମାମଲାର ଶୁଣାଣି କରି ଏହି ନିର୍ଦ୍ଦେଶ ପ୍ରଦାନ କରିଛନ୍ତି।
ଏହା ଉଲ୍ଲେଖଯୋଗ୍ୟ ଯେ ୨୦୨୪ ନିର୍ବାଚନରେ କେ. ଅନୀଲ କୁମାର ୫୪,୯୯୭ ଭୋଟ ପାଇ ବିଜୟୀ ହୋଇଥିଲେ, ଯେଉଁଠାରେ ବିଜେଡି ପ୍ରାର୍ଥୀ ଡାକ୍ତର ରମେଶ ଚନ୍ଦ୍ର ଚଉ ପଟ୍ଟନାୟକ ୩୬,୨୮୮ ଭୋଟ ପାଇ ଦ୍ୱିତୀୟ ହୋଇଥିଲେ। ଶ୍ରୀ ପଣ୍ଡା ଜଣେ ସାଧାରଣ ଭୋଟର ଭାବେ ଏହି ଫଳାଫଳକୁ ଚ୍ୟାଲେଞ୍ଜ କରି ମକଦ୍ଦମା ଦାୟର କରିଥିଲେ।
