ଭୁବନେଶ୍ୱର: ମହିଳା ଏବଂ ଶିଶୁ ବିକାଶ ବିଭାଗ ଆନୁକୂଲ୍ୟରେ, ଭାରତୀୟ ମାନବ ବସତି ପ୍ରତିଷ୍ଠାନ ବାଙ୍ଗାଲୋର ଓ ପ୍ରାରମ୍ଭିକ ଶୈଶବ, କ୍ରେଚ (ଶିଶୁ ସଦନ), ଶିକ୍ଷା, ମାତୃ, ନବଜାତ ଏବଂ ଶିଶୁ ସ୍ୱାସ୍ଥ୍ୟ ସହିତ ସଂପୃକ୍ତ ବୈଷୟିକ ବିଶେଷଜ୍ଞମାନଙ୍କ ସହଯୋଗରେ ଭୁବନେଶ୍ୱରରେ ଦୁଇ ଦିନିଆ ପରାମର୍ଶ ବୈଠକ-ସହ-କର୍ମଶାଳା ଆୟୋଜିତ ହୋଇଛି। ମହିଳା ଏବଂ ଶିଶୁ ବିକାଶ ବିଭାଗର ପ୍ରମୁଖ ଶାସନ ସଚିବ ଶ୍ରୀମତୀ ଶୁଭା ଶର୍ମା ଏହାର ଉଦଘାଟନ କରିଥିଲେ।
କର୍ମଶାଳାରେ ବିଭିନ୍ନ ଶାସନ ସଚିବ, ନିର୍ଦ୍ଦେଶକ, ଆଇସିଡିଏସ୍ର ଅତିରିକ୍ତ ଶାସନ ସଚିବ, ଶିଶୁ କଲ୍ୟାଣ, ମହିଳା ସଶକ୍ତିକରଣ, ତାଲିମ ଓ ସମନ୍ୱୟ ବିଭାଗ ଏବଂ ‘ମମତା’ ପ୍ରକଳ୍ପ ସହିତ ସଂପୃକ୍ତ ଅଧିକାରୀମାନେ ଉପସ୍ଥିତ ଥିଲେ।
ପରାମର୍ଶ ବୈଠକରେ ରାଜ୍ୟର ସମସ୍ତ ଜିଲ୍ଲାର ପ୍ରତିନିଧି, ଜିଲ୍ଲା ସମାଜ କଲ୍ୟାଣ ଅଧିକାରୀ, ଶିଶୁ ବିକାଶ ପ୍ରକଳ୍ପ ଅଧିକାରୀ, କାର୍ଯ୍ୟକ୍ରମ ଅଧିକାରୀ, ପର୍ଯ୍ୟବେକ୍ଷକ, ଅଙ୍ଗନବାଡି କର୍ମୀ ଏବଂ ମୋବାଇଲ୍ କ୍ରେଚ୍ ଓ ଆପ୍ଲାଏଡ୍ ସାଇନ୍ସେସ୍ ସୋସାଇଟିର ବିଶେଷଜ୍ଞମାନେ ଅଂଶଗ୍ରହଣ କରିଥିଲେ।
ଏହି ପରାମର୍ଶ କର୍ମଶାଳାର ପ୍ରାଥମିକ ଉଦ୍ଦେଶ୍ୟ ହେଉଛି ଓଡ଼ିଶାରେ ପାଲନା (PALNA) ଯୋଜନା ରାଜ୍ୟ ସ୍ତରରେ ସଫଳ ଭାବେ କାର୍ଯ୍ୟାନ୍ୱୟନ ପାଇଁ ଏକ ମାନକ କାର୍ଯ୍ୟକାରିତା ପ୍ରକ୍ରିୟା (SOP) ପ୍ରସ୍ତୁତ କରିବା। ଏହା ଦ୍ୱାରା ଭାରତ ସରକାରଙ୍କ ପାଲନା ନିର୍ଦ୍ଦେଶାବଳୀ ସହିତ ସମନ୍ୱୟ ରଖି, ଓଡ଼ିଶାର ଆବଶ୍ୟକତା ଅନୁରୂପ ଏକ ସମଗ୍ର ଢାଞ୍ଚା ତିଆରି ହେବ।
ଉଦଘାଟନ ଅବସରରେ ପ୍ରମୁଖ ସଚିବ ଶ୍ରୀମତୀ ଶୁଭା ଶର୍ମା କହିଲେ, “ମହିଳାଙ୍କ ଶ୍ରମଶକ୍ତି ଅଂଶଗ୍ରହଣ ବୃଦ୍ଧି କରିବା ହେଉଛି ବିଭାଗର ପ୍ରମୁଖ ପ୍ରାଥମିକତା। ପାଲନା ଯୋଜନା ଏହି ଉଦ୍ଦେଶ୍ୟକୁ ସଫଳ କରିବାରେ ଗୁରୁତ୍ୱପୂର୍ଣ୍ଣ ଭୂମିକା ନିଭାଉଛି। କର୍ମଜୀବୀ ମା’ମାନେ ଏହି ପ୍ରକଳ୍ପ ଦ୍ୱାରା ନିରାପଦ ଓ ନିର୍ଭରଯୋଗ୍ୟ ଶିଶୁ ଯତ୍ନ ସୁବିଧା ପାଇପାରିବେ।”
ସେ ଅଧିକ କହିଲେ, “ଶିଶୁଜୀବନର ପ୍ରଥମ ୧,୦୦୦ ଦିନ ଅତ୍ୟନ୍ତ ଗୁରୁତ୍ୱପୂର୍ଣ୍ଣ; ଏହି ସମୟରେ ୮୫% ମସ୍ତିଷ୍କ ବିକାଶ ହୁଏ। ତେଣୁ ଏହି ପର୍ଯ୍ୟାୟରେ ସୁରକ୍ଷିତ ଓ ଉତ୍ସାହଜନକ ପରିବେଶ ଦେବା ଅତ୍ୟାବଶ୍ୟକ।” ସେ ଯୋଗ କଲେ ଯେ, ବିଭାଗ ମହିଳାଙ୍କ ଆର୍ଥିକ ଓ ବୃତ୍ତିଗତ ସକ୍ଷମତା ବଢ଼ାଇବା ପାଇଁ ସାଂସ୍ଥାଗତ ସହାୟତାକୁ ଅଧିକ ସୁଦୃଢ଼ କରିବାକୁ ପ୍ରତିବଦ୍ଧ।
